عشان انت مصرى

عشان انت مصرى*



عشان انت مصرى لازم تعانى



وتفقد كرامتك بكل المعانى



وتحرق فى دمك سنين مش ثوانى



واوعى تصدق كلام الاغانى



بتاع الحضاره وكانى ومانى



ده كله هجايص مايدخل ودانى



عشان انت مصرى العذاب بيناديك



بتبدا فى يومك حاجات بترازيك



فى نومك فى قومك تعكنن عليك



تضايقك ولسه العماص فى عينيك



مافيش ميه تشطف صابونه فى ايديك



وجسمك ملزق وريحتك عاديك



فتلبس وتنزل وفيك اللى فيك



ورايح لشغلك حتحتاج مواصله



ادى المترو واقف وكهربته فاصله



وفى الميكروباص خناقه وحاصله



اوتوبيس فرامله عايزالها وصله



وتوك توك ده تايه ومحتاج لبوصله



بتوصل لشغلك بدم اتحرق



فى زحمه وكتمه وحر وعرق



رئيسك سايبلك كومه ورق



ده غير دمغه ضايعه وملف اتسرق



وفى كام مواطن عاملك قلق



بيشكى تقول له روح اندعق



وعركه وهوجه وشاى اندلق



ومخك خلاص من الصداع اتفلق



هترجع لبيتك ده لو كان فى بيت



هتوصل هتندم ياريتك ماجيت



مراتك بتصرخ خلاص استويت



عيالك بتطلب وهات كيت وكيت



تزعق تهاتى ياناس اتهريت



ولاحد سامعك مهما هاتيت



عشان انت مصرى وده للاسف



فلازم تاسى تعيش تتقرف



وكل الاساسى فى حياتك ترف



فتنسى الكرامه وتنسى الشرف



وتسرق وتنصب او تنحرف



ودمعك بيجرى وجرحك نزف



مش انت اللى مصرى؟؟؟ جتك القرف

والله يا جماعه فعلا احنا مشكلتنا اننا بنشمت الغرب فينا

واحنا اللى بنخالي كرمتنا فى الارض بسبب الكلام ده

وبنخالي ناس ملهاش لزمة تلعن فينا

لو انتا مش عايز تبقى مصري لية قاعد فيها لحد دلوقتي

قول الحمد لله انك مصري لان المصري فية صفات كتيره اوي وجميلة اوي اوي مش فى حد تاني من دول العالم كلو

كفاية انها مذكوره فى القران الكريم ثلاث مرات

كفاية انك خير جنود الارض

حاجات كتيره اوي اوي

ومتقوليش لية انا مش من اي دولة تانية لان الدول التانية كلها بتتمني انها تكون مصر