مساء الخير او صباح الخير احبتي

صباح الخير عليكم كلكم

هدخل في الموضوع على طول

بلف في جوجل .. لقيت رابط فيه كلمه خدمه اجتماعية بنها ..

لما دورت على منتدى للخدمة الاجتماعية ببنها وصلت لهنا

وافتكرت من حوالي خمس او اربع سنين لما كنت طالب في المعهد

منهم السنتين الاخيرتين للاسف خارج مصر الى الآن

حبيت ادخل واعبر بكل تلقائية

وحشتني بنها جدا بكورنيشها بقصر الثقافة بالتمثال بالموقف القديم والجديد بجحا بتاع الكشري بكافيتيريا التجاريين

وحشتني بنها بالمطعمين بتوع الفول والطعمية اللى جنب بعض ( معرفش لسه موجودين ولا قففلوا )

وحشني المدرجات أ- ب .. ومدرج ج اللى اتبنى في اخر سنة ليا في المعهد

وحشني صديق شخصي ليا وهوا مشرف تدريب عندكم حاليا اسمه دكتور تامر الشحات او دكتور معوض .. معرفش ان كانوا لسه موجودين ولا لا

وحشتني مدام هناء المشرفه الفنية لرعاية الشباب واستاذ ايهاب اللى قامت ما بينا خناقات للسما علشان ااسس فرقة المسرح في المعهد .. اشتغلت سنه وبطلوها

وحشني احمد يسري بتاع فرقة الموسيقى وبرده ماعرفش هوا لسه موجود ولا لا ( رجاء من اللى يعرفه يديني رقمه )

وحشنا عميد المعهد الدكتور سيد عشماوي الله يرحمه .. والدكتور سمير عبد الفتاح اللى جه في اخر سنة لينا في المعهد

ودكتورة سحر مبروك وهاله منصور ورافت وعماد ابو دقن وكل الناس الحلوة دي

وحشني امين الشرطة الغتت اللى اسمه احمد اللى على البوابة .. ماعرفش برده موجود ليه ولا لا

وعم محمد وعم ربيع عمال المدرج

ولا مصلي الصغير اللى عملناه بادينا من الصاج اللى قدام كشك عيش التدريب ( كنا بنقول عليه كده )

احب اقولكم اننا ايام ما كنا طلبه .. كنا كارهين ايامنا في المعهد قوي ..وكنا بنقول امتى ييجي اليوم اللى نخلص فيه المعهد علشان نشتغل ونكون نفسها ..

كنا شله صغيره بس كنا مترابطين اوي شباب وبنات ..

لما خلصنا .. يمكن فيه ناس منهم الله وحده اعلم هما فين وعايشين ازاي .. وبقينا نترحم على كل يوم قضيناه في المعهد

عارف اني ممكن اكون صدعتكم معايا .. ودخلتكم في تفاصيل كتير .. بس ده شعور واحد كان طالب في المعهد العالي للخدمه الاجتماعية ببنها وخارج مصر حاليا


لا سؤال بالمناسبة ( هما كانوا قالولنا ان السنة اللى بعد سنه التخرج بتاعتنا هيقلبوها كليه ..قلبوها ولا لسه ) ؟؟؟!!!